ازاي تعرف تليفونك عليه رسوم جمركية ولا لأ.. هنقولك الخطوات

مصر خلاص بدأت تطبيق الرسوم الجديدة علي التليفونات المحمولة، واي تليفون  صاحبه مدفعش الرسوم اللي عليه هيتوقف فورا.. ياتري اية الخطوات اللي اعملها لو هشتري تليفون جديد .. والرسوم علي التليفونات بتوصل لكام.

من كام يوم وتحديدا من يوم 7 ابريل الحالي، مصر بدات تنفذ بنود قرار وقف تشغيل الهواتف المحمولة المستوردة واللي اصحابها مسددوش الرسوم الجمركية المقررة واللي بتوصل لـ38% من قيمة الهواتف، والهدف من القرار هو الحفاظ علي الصناعة المصرية، خصوصا أن مصر حاليا فيها اكثر من شركة متخصصة في صناعات الهواتف المحمولة.

طيب امتي الحكومة اقرت فرض رسوم جمركية علي وارادات الهاتف المحمول؟.

من حوالي اكثر من 3 شهور، والحكومة ممثلة في الجهاز القومي للاتصالات اعلنت عن استعداداتها لفرض رسوم جمركية علي ورادات الهاتف المحمول وحددت نسبة الرسوم الجمركية بـ38% من قيمة الهاتف المحمول، واعلنت عن مهلة وصلت لـ3 شهور فرصة للناس لتوفيق اوضاعها قبل اتخاذ قرار بقفل الهواتف المحمولة واللي اصحابها غير ملتزمين بدفع الرسوم المقرر، والمهلة دي بدأت في أول شهر يناير اللي فات وانتهت يوم 7 ابريل الحالي، وحاليا اي حد جاب تليفون من برا ومدفعش الرسوم الجمركية اللي عليه، الجهاز القومي للاتصالات بوقفه عن العمل فورا لحين دفع الرسوم.

الجهاز القومي للاتصالات حدد كمان قواعد واضحة وصريحة لدخول التليفونات المحمولة مع المسافرين، وقال أن من حق كل مسافر أن يدخل بتليفون واحد بس بدون جمارك وبحد اقصي 4 تليفونات محمولة بشرط أن يدفع رسوم جمركية لـ3 تليفونات التانيين، وفي حالة لو المسافر جاب اكثر من 4 تليفونات محمولة فكده بيدخل تحت بند التهريب والتجارة في التليفوانات المحمولة.

نيجي بقي للحتة المهمة للناس اللي بتسأل عن خطوات دفع الرسوم الجمركية للتليفونات المحمولة واللي جايبنها معاهم من الخارج، وهنا الجهاز القومي لتنظيم الاتصالات عمل برنامج اسمه تليفوني يقدر اي مواطن معاه تليفون عليه رسوم جمركية، ودي بيعرفها من الرسالة اللي بيبعتها الجهاز للناس علي الاجهزة اللي عليها رسوم جمركية، ويقدر المواطن يدخل علي التطبيق ويدفع الرسوم الجمركية اللي علي الموبايل والتليفون هيفضل شغال بشكل مستمر بدون ما يتقفل.