يا ترى إيه اللي بيخلي مصر دلوقتي محط أنظار الاستثمارات الصينية؟ و ليه الصين بتبص للسوق المصري بنظارة اهتمام كبيرة؟ .. وإزاي ممكن نص مليار دولار استثمارات جديدة تغير شكل الاقتصاد المصري؟ وايه الخطوة الاقتصادية الكبيرة اللى مصر بتخطط ليها مع الصين .. وإزاي العلاقة دي هتأثر على السوق المحلي والتبادل التجاري؟
مصر بقت وجهة مهمة جدا للاستثمارات الأجنبية .. وبالأخص الصينية .. والحكومة المصرية بتستهدف إنها تجيب استثمارات صينية جديدة بقيمة نص مليار دولار على الأقل في 2025 .. وده مش رقم صغير .. لو الاستثمارات دي فعلاً حصلت .. إجمالي الاستثمارات الصينية في مصر هيوصل لـ 3.6 مليار دولار.
وخد بالك الصين مش بتستثمر كده على الفاضي .. بكين عندها خطة كبيرة عشان توسّع شراكاتها في العالم .. خصوصاً بعد ما واجهت عقبات زي الرسوم الجمركية في أمريكا .. وهنا مصر دخلت الصورة .. موقعها الاستراتيجي .. وقربها من قناة السويس .. واستقرارها الاقتصادي اللي بيزيد يوم عن يوم .. كل دي عوامل خلّت مصر وجهة مثالية للصينيين.
وفي مايو 2025 .. مصر هتستقبل 3 وفود أعمال صينية .. الوفود دي جاية مخصوص عشان تدرس السوق المصري وتشوف إيه الفرص اللي ممكن تستثمر فيها .. مش بس كده .. مصر بقت بتستقبل وفود صينية بشكل دوري .. يعني العلاقة مش مجرد زيارة وخلاص .. لا .. دي شراكة طويلة الأمد.
المنطقة الاقتصادية لقناة السويس هي اللي بتسرق الأضواء دلوقتي .. الصينيين مهتمين بيها بشكل كبير .. من أول 2025 .. المنطقة دي شهدت حوالي 10 مشاريع صينية باستثمارات وصلت لـ 828.5 مليون دولار .. المشاريع دي في مجالات زي الملابس والمنسوجات .. سلاسل توريد الأجهزة المنزلية .. الخلايا الشمسية .. وحتى الكلور القلوي .. يعني مشاريع متنوعة وكلها بتخدم السوق المحلي وبتقلل الاعتماد على الاستيراد.
وخلينا نروح للتبادل التجاري بين مصر والصين .. في 2024 حجم التبادل التجاري بين البلدين كان حوالي 16 مليار دولار .. والتوقعات بتقول إنه في 2025 هيزيد بنسبة 10% .. يعني هنوصل لـ 17.6 مليار دولار .. ده رقم ضخم .. بس ليه الرقم ده مهم؟ .. لأن التبادل التجاري ده بيفتح أبواب للصادرات المصرية .. وبيخلّي المنتجات المصرية تدخل سوق زي الصين .. اللي فيها أكتر من مليار ونص مستهلك.
مصر بتستورد من الصين حاجات زي الآلات الكهربائية .. السيارات .. الحديد والصلب .. بقيمة 15.5 مليار دولار في 2024 .. لكن الصادرات المصرية للصين كانت أقل بكتير .. حوالي 400 مليون دولار .. بس في أمل كبير إن الصادرات دي تزيد بنسبة 15-20% في 2025 .. يعني ممكن نوصل لـ 500 مليون دولار .. والصادرات الزراعية زي الفواكه هي اللي ممكن تكون نجمة الموسم .. لو اتغلبت على تحديات زي تكاليف الشحن.
طب ايه مستقبل العلاقات المصرية الصينية؟
العلاقة بين مصر والصين مش هتقف عند الاستثمارات والتبادل التجاري .. في خطط كبيرة عشان يتعمل تعاون في مجالات زي التكنولوجيا الخضراء والطاقة المتجددة .. مصر عندها فرصة إنها تبقى مركز تصنيع إقليمي للصين في إفريقيا والشرق الأوسط .. وده هيخلّيها لاعب أساسي في سلسلة التوريد العالمية
المؤكد ان مصر بتفتح أبوابها لاستثمارات صينية هتغير قواعد اللعبة .. نص مليار دولار هو البداية .. وبوابة لمشاريع جديدة .. فرص شغل .. وعلاقات اقتصادية أقوى.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
