ايه القرارات المهمة اللي هتطبق بعد قرار البنك المركزي المصري الأخير.. وسعر الدولار هيروح على فين بعد إجازة البنوك الطويلة.
اليوم الثلاثاء بداية العودة للعمل في البنوك بعد اجازات الاعياد وبعد قرار البنك المركزي المصري الأخير الخميس اللي فات بتخفيض سعري العائد والإقراض بمقدار 225 نقطة أساس لتصل الفايدة الحالية إلى 25% للإيداع و26% للإقراض وفقا لسعر الكوريدور.
طبعاً قرار الخميس ورغم إنه كان متوقع لكن كان ليه تأثيرات مباشره على الأسواق والسياسات الاقتصادية واتجاهات الاستثمار ... وطبعا خفض الفائدة هيكون ليه تأثير مباشر أسعار على الفوائد المعلنة من البنوك العاملة في مصر على منتجاتها البنكية سواء قروض أو أوعية ادخارية خاصة الشهادات البنكية ذات العائد المرتفع وقلنا هنا في بانكير قبل صدور قرار المركزي إن فيه اتجاه من البنوك لخفض فائدة شهادات العائد الكبير وفعلا فيه بنوك استبقت قرار اللجنة ودا بسبب التكلفة العالية للشهادات العالية في البنوك.
طيب ليه اليوم حاسم في البنوك؟
عشان اكتر من سبب أولها أن الدولار هيرجع للتداول قدام الجنيه بعد فترة من التباين والصعود والنزول الفترة اللي فاتت ووصوله لحاجز 52 جنيه قبل ما يستقر عند 51.06 جنيه ومتوقع هيكون فيه تحركات نشطة للدولار ودا شيء طبيعي بعد فترة الإجازات بسبب تراكم الطلب على العملة الأمريكية من المستوردين والهيئات الاقتصادية والشركات لكن على المستوى العام الدولار متوقع يشهد استقرار كبير أمام الجنيه ودا بسبب التدفقات الاستثمارية الكبيرة اللي تم الإعلان عنها الفترة اللي فاتت وتحسن مؤشرات دولارية بشكل كبير في الأيام الأخيرة زي زيادة اصول البنك المركزي.
كمان اليوم هيكون بداية قرارات بعض البنوك بخفض العاىد على شهادات الادخار عندها ومثلا البنك التجاري الدولي «CIB»، كشف عن تخفيض العوائد على الحسابات والودائع البنكية لديه بالجنيه المصري واعلن دا من خلال موقعه الإلكتروني وقال إن التعديلات دي هتسري بداية من اليوم الثلاثاء 22 أبريل الحالي يعني بعد انتهاء الإجازة الرسمية للبنوك العاملة في مصر.. ودا كان متوقع ومنطقي جدا بعد قرار المركزي الأخيرة بخفض الفايدة...
وفي نفس الوقت سبق واعلن الموقع الرسمي للبنك الأهلي وبنك مصر وهما اكبر بنكين حكوميين في مصر إن لجنة الأصول والخصوم بالبنكين هتجتمع خلال أيام للنظر في أسعار الفايدة على الشهادات بعد تخفيض البنك المركزي للفائدة 2.25% ودا تمهيد لخفض سعر الفائدة على شهادات الادخار خاصه الشهادات اللي فايدتها كبيرة ولغاية صدور قرار لجنة الأصول والخصوم أسعار الشهادات في بنكي الأهلي ومصر هتفضل زي ما هي..
طبعا الاستثمار في شهادات الادخار والمنتجات البنكية التانية من افضل عمليات الاستثمار من حيث الامان والراحة وتجنب الإضطرابات في أسواق الاستثمار التانية ورغم كده تخفيض سعر الفايدة بشكل عام بيصب في مصلحة سوق الدهب واللي بيشهد زيادة في الإقبال وقت تخفيض البنوك للفايدة ودا عشان الدهب بيكون هنا أكثر ربحية من الاستثمار في أسواق تانية وطبعا كلنا شايفين الارتفاعات القياسية في سعر الدهب اصلا بسبب اللي بيحصل في العالم.. عشان كده محدش عارف اليوم هيحصل ايه والمشهد الحالي خلى ناس كتير تعيد حساباتها في قصة الاستثمار ودا بيصب في صالح البنوك لأن المستثمر هيدور على الامان قبل كل شيء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
){kind=link}