هي لجنة ضبط الأسعار هتعمل ايه في اجتماعها اللي جاي.. وهل الأسعار هتنزل وايه علاقة الأسعار بمشروع الدلتا الجديدة.. وايه المفاجأة اللي الحكومة بتحضرها للمصريين.
الدكتور مصطفى مدبولي رئيس الوزراء فجر مفاجأة مهمة للمصريين في مؤتمر صحفي وأعلن إنه هيتم عقد اجتماع الأسبوع الجاي للجنة ضبط الأسعار لمتابعة أسعار السلع.. وزي ما شفنا من التصريحات إن اللجنة دي مهمتها متابعة الاسعار والوفرة في السلع وتقييم اسعارها الحالية.. رئيس الحكومة كان بيرد على سؤال عن السلع اللي ممكن أسعارها تنزل في الفترة الجاية خاصة بعد الانخفاض الأخير في سلع مهمة زي البيض والدواجن واللحوم.. فهل ياترى هنشوف فعلا انخفاض في الأسعار الفترة الجاية؟
السؤال دا جاوب عليه مدبولي نفسه وقال إن الأمر مرهون بالعرض والطلب يعني بوفرة السلع ودا قانون تجاري قديم ومعروف وهو إن لو المعروض من سلعة معينة كبير فطبيعي سعرها ينزل والعكس صحيح ودا بنشوفه فعلا في الأسواق وقال مدبولي إن الوفرة في الإنتاج بتزيد المنافسة وبتساعد على ثبات وانخفاض الأسعار وخاصة في السلع زي المواد الغذائية اللي مدد صلاحيتها مش طويلة ومن مصلحة المصنع ضمان بيع إنتاجه لاستمرار دورة العمل.
مدبولي قال كمان إن الحكومة بتابع على مدار اليوم حجم توافر السلع ودخول مستلزمات الإنتاج لضمان عمل المصانع بكامل طاقتها وانعكاس دا على توافر السلع وخفض الاسعار وكشف انه هيتم عقد اجتماع الأسبوع الجاي للجنة ضبط الأسعار لمراجعة الأوضاع وبحث إجراءات تحفيزية في الأمر.
يعني باختصار الحكومة هتراجع المعروض من السلع وتشوف الأسعار المبالغ فيها وسبب ارتفاعها سواء من المصنع أو التجار وتشوف الخلل في دورة التوزيع لغاية الوصول للمستهلك النهائي.. وعشان نكون عارفين الحكومة مش بتسعر السلع يعني مفيش تسعيرة اجبارية لكن السوق عرض وطلب لكن مهمتها بتشوف السعر العادل للسلعة وتدخل لو فيه مبالغة في السعر ويتراجع المصنع أو تزود المراقبة على الأسواق ولأن فيه أسعار سلع كتير مبالغ فيها فالحكومة المفروض هتدخل بعد اجتماع اللجنة عشان تاخد إجراءات كتير لخفض الأسعار في الفترة الجاية لسلع كتير خاصة مع استقرار اسعار صرف الدولار وانتعاش الإنتاج وتحسن المؤشرات الاقتصادية بشكل عام.
مدبولي اتكلم في حاجة تانية مهمة وهو مشروع الدلتا الجديدة ودا مشروع زراعي ضخم يهدف لاستصلاح ما بين 2.2 إلى 2.8 مليون فدان موزعة على عدة مشاريع لتضيف 15% مساحة منزرعة جديدة لمصر تستغل لتحقيق الأمن الغذائي والمشروع بيقع بالصحراء الغربية بالقرب من الساحل الشمالي الغربي وطبعا قرب دخول المشروع للانتاج معناه وفرة كبيرة في إنتاج ومعروض الخضر والفاكهة والحبوب والصناعات الغذائية القايمة على المحاصيل الزراعية ودا معناه انخفاض ملحوظ في سلع كتير كل المصريين بيستهلكوها.. وعشان كده مدبولي قال ان مصر هتجني ثمار مشروع الدلتا الجديدة خلال الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
