العالم كله في حالة طوارئ بسبب التوترات الاقتصادية.. والدول كلها مترقبة القرارات الجديدة... ياتري ازاي الحكومة بتستعد أزاي علشان تواجه السيناريوهات الاقتصادية المتوقعة.. وهل الاقتصاد المصري جاهز لمواجهة التقلبات الاقتصادية المتوقعة.
الفترة الحالية الاقتصاد العالمي بيشهد تغيرات اقتصادية غير متوقعة، وكانت البداية بزيادة التوترات الجيوسياسية بين الدول واشتعال ازمات وتوترات كتيرة بين الدول وبعضها، وده عمل ازمات عالمية في الغذاء والوقود واسعار السلع تضاعف مرات المرات بسبب الأزمة الأوكرانية الموجودة دلوقتي بين روسيا وأوكرانيا اللي هيا بتعتبر سله غذاء العالم، والدولتين دول بينتجوا نسبة كبيرة من الغذاء العالمي خصوصا القمح، وبسببب الأزمة اللي بينهم اسعار الحبوب ارتفعت بارقام مهولة وده حمل فاتورة اقتصادية مرتفعة علي الدول.
التوترات الجيوسياسية الموجودة بين الدول موقفتش علي كده، لا ده كمان زادت بالرسوم الجمركية الجديدة اللي اقرها الرئيس الأمريكي دونالد ترامب علي كل دول العالم قبل ما يتراجع تاني ويقرر تجميد تطبيق الرسوم الجمركية علي كل دول العالم لمدة 90 يوم، ولكن الأدارة الامريكية قررت تستثني الصين من قرارات تجميد الرسوم الجمركية، وكمان قررت مضاعفة الرسوم الجمركية علي الواردات الصينية علشان توصل لنسبة 104%، والصين ردت هيا كمان علي القرارات الأمريكية وقررت رفع الرسوم الجمركية علي الواردات والبضائع الامريكية لـ125% والقرارات دول عملوا تغيرات دولية في اسعار السلع وسببوا ازمة كبيرة في البورصة الدولية وكانوا سببب رئيسي في زيادة اسعار السلع في العالم كله.
طيب اية تاثير القرارات الاقتصادية الامريكية الصينية علي الاقتصاد المصري ؟.
التوترات الاقتصادية اللي موجودة حاليا بين الصين والولايات المتحدة الأمريكية كان لها توابع كبيرة جدا علي الاقتصاد الدولي بشكل عام وطبعا مصر واحدة من الدول اللي تاثرت بالمشاكل دي ولكن تاثير محدود خصوصا أن بعد قرارات ترامب بتعليق تطبيق الرسوم الجمركية اللي فرضها لمدة 90 يوم، ده غير أنه في حالة تطبيق الرسوم الجمركية فيوصل معدل التاثير علي الصادرات المصرية لـ10% بس، ودي نسبة بسيطة جدا مقارنة بباقي الرسوم المفروضة علي البضائع العالمية.
الدكتور مصطفي مدبولي رئيس مجلس الوزراء، في المؤتمر الصحفي اللي عقده بعد اجتماع الحكومة الأسبوعي اتكلم علي تاثير الرسوم الجمركية الجديدة وقال ان الاقتصاد المصري حاليا وصل لمرحلة كويسة بفضل التحفيزات اللي قدمتها الحكومة لجذب المستثمرين وأصحاب رؤوس الأموال الأجنبية للسوق المصري، وأن اللجنة الاقتصادية حطت 3 سيناريوات للتعامل مع الاوضاع الاقتصادية العالمية، والـ3 سيناريوهات دول قابلين للتنفيذ في اي وقت، وأن الاقتصاد المصري حاليا بقي مرن وقادر علي مواجهة الصدمات بفضل البنية التحتية والتشريعية اللي اقرتها الحكومة للتعامل مع المتغيرات الدولية واللي جانب لها عامل كبير في جذب نسبة كبيرة من الاستثمارات الاجنبية اللي موجودة حاليا في السوق المصري واللي حاليا بقت بتشكل ايراداتها عصب الصادرات المصرية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
