كشفت ولية أمر عن تعرض طفلها الطالب بالمرحلة الرابعة من التعليم الأساسي (national grade 4) بمدرسة مصر الحديثة «MSE» بالتجمع الخامس؛ للتعدي على يد أحد المدرسين داخل المدرسة.
معلم يعتدي على طالب بالضرب في التجمع
وقالت الأم إن نجلها كاد أن يفقد حياته بسبب تعدي المدرس عليه بالضرب لمعاناته من وجود أكياس دموية في عنق الرقبة وخلف الأذنين.
وأضافت ولية الأمر في استغاثتها: “أنا أم لطفل كان في مدرسة mse جنوب الأكاديمية national grade 4، فوجئت بيه في يوم ورقبته وارمه جامد مع العلم أنه بيعاني من وجود أكياس دموية في عنق الرقبة وخلف الأذنين وكان خاضع لعلاج بالفعل قبل التدخل الجراحي، فوجئت بتورم شديد في الإكياس وإحمرار شديد والطفل سخن يومين بعديها جامد”.
وتابعت: “فهمت منه انه تم الإعتداء عليه من قبل مدرس الـscience وأنه راح للعيادة للكشف عليه؛ المدرس مسكه من رقبته ورفعه لأعلى السبورة الـsmart وضحك عليه الكلاس كله طبعا عرضه لموقف صعب ومعين نفسيا والأهم أضر بصحته لأن حصل تضخم كبير في الأكياس وكانت عرضة للانفجار ومما ممكن يؤدي إلى تسمم وموت مفاجئ”.
واستكملت: “روحت أنا وباباه المدرسة وقابلت مديره المرحله ميس غاده وتعاملت ـنه موضوع بسيط لا يذكر وأنهم اتكملو مع المدرس وبتقول اصله لسا جديد قليل الخبرة واتعصب شوية ونزل وحكالنا اللي عمله في زين وأننا وديناه العيادة وكل ده المدرسة المحترمة متبلغش لا الأم ولا الأب طالما الموضوع متعرفش يبقى نقفل عليه ومش مهم حق الولد”.
واستطردت في شكواها: “حصل مشادة كلامية وصاحب المدرسه تدخل وحاول التهجم علينا والضرب لولا تدخل الأمن، وبعتو لينا مسؤل من الإدارة بملف زين قالو الولد مفصول ياريت تمضو على قرار النقل وطبعا ده كان في منتصف الترم الدراسي الأول، رفضت ومشيت طلعت على الإدارة التعليمية بالتجمع التالت وعملت شكوى عند الدكتورة نرمين مديرة الإدارة وبالفعل اتصلت بالمدرسة وقالت يروح عادي جدا وطلعو حملة من الإدارة للتحقيق مع المدرس وكإن شيء لم يمكن مفيش أي جديد لا المدرس أتفصل ولا حق زين رجع”.
وتابعت: “عملت محضر في قسم التجمع الخامس التابع ليها المدرسة والمحضر أتحفظ برضه، وعملت شكوى على المدرسة في منظومة الشكاوى بمجلس الوزراء الإلكتروني ومفيش أي رد، طبعا الولد خلال الفتره دي كلها كان صحيا تعبان عرضه على أكتر من طبيب أطفال وعمل رنين على الرقبة بالكامل وأخد علاجات كتيرة وإتأثر نفسيا كتير بعد الموقف ده قدام زمايله في الكلاس وكان بيعاني يوميا وهو رايح المدرسه نفسيا، وديته طبعا لدكتورة نفسية تخصص أطفال تباشر الحالة”.
وأضافت: “أنا كأم بحاول أتماسك وأكون عاقلة، قررت كده كده نقل ابني من المدرسة بس يخلص المتبقي من الترم لصعوبة النقل أثناء الدراسة، بس تعرضت للمضايقات المدرسة كانت رافضة دخولي المدرسة كأم نهائي حتى وإني استلم ابني بالرغم أن ده سيستم المدرسة وكل الأمهات بيدخلو يجيبو أولادهم كنت بنتظر بالساعة في عز التلج في الشتا على أمل اني المحه جوا اناديه يطلع ليا، روحت الparents meting رفضو دخولي”.
وقالت: “قابلت أم أمام البوابه كانت بتشتكي من نفس الشكوي بتعدي مدرس علي ابنها بالضرب علي اليد حتي النزيف والاب كان في الإداره بيعمل مشكله كبيره برضه يعني الموضوع مش حالة فردية دي شكوى عامة، الواحد مبقاش عارف هو بيدخل اولاده مدارس خاصه يتعلمو تعليم افضل ويكونو في محيط ارقي ولا بيوديهم يتئذو نفسيا ويتبهدلو وكمان بدل لما المدرسه تاخد موقف رادع مع المدرسه وتفصله فورا ويراضو الطفل لا يقررو فصل الطفل علشان الشوشرة”.
واختتمت الأم حديثها قائلة: “أنا بكتب دلوقتي الكلام ده تحذيرا من المدرسة Mse وإني خلاص نقلت ابني الحمدلله مدرسة أفضل أخلاقيا وإداريا، وبطالب بحق زين من إهانة واعتداء جسدي عليه وكلي أمل صوتي يوصل للمسؤلين”.
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
