إيه اللي بيحصل في أسواق السياحة الدولية دلوقتي.. وليه مصر تصدرت المشهد وايه اللي حصل في دبي الساعات اللي فاتت.. وايه الحدث اللي هيقلب حال شركات السياحة والسفر والضيافة الدولية.
من النهاردة ولغاية يوليو اللي جاي مصر والعالم كله هيتكلم عن الحدث السياحي الأول في أسواق الضيافة والسفر العالمية ودا لأن مصر انتهت من وضع اللمسات الأخيرة لافتتاح المتحف المصري الكبير أيقونة المتاحف العالمية واللي متوقع يكون احتفال تاريخي العالم كله هيتفرج عليه زي ما حصل كده في موكب نقل المومياوات الملكية من متحف التحرير لمتحف الحضارة.. يعني بنتكلم في دعايه مجانية بمليارات الدولارات للسياحة في مصر وسط وكلاء وشركات الطيران والسياحة العالمية.. ومصر هتبقي ترند العالم الايام الجاية.
وسائل الإعلام الدولية وسوق السياحة العالمي بكل مكوناته دلوقتي بيتابع استعدادات مصر لافتتاح المتحف المصري الكبير وعشان كده تصدر موعد افتتاح المتحف المصرى الجديد المشهد فى سوق السفر العربى بدبى بالإمارات العربية المتحدة اللي اختتم فعالياته نهاية الأسبوع اللي فات واللي ركز على الترويج للمتحف المصرى الكبير وموعد افتتاحه الرسمى المقرر له يوم 3 يوليو اللي جاي..
طبعا المؤشرات دي بتقول وبتكشف حجم التدفقات السياحية اللي جاية مصر بعد افتتاح المشروع الأهم في العالم وبتقول كمان إن قطاع السياحة هيشهد طفرة كبيرة في الشهور والسنين الجاية وهيكون حجر الزاوية في انطلاق الاقتصاد المصري وتوفير العملات الأجنبية وانتعاش كل القطاعات الاقتصادية لأنها مرتبطة بشكل أو بآخر بالقطاع السياحي ودا غير زيادة فرص العمل لأن القطاع دا كثيف العمالة ومرتباته كويسة جدا.
ونرجع للمتحف المصري الجديد وهنلاقي إن عدد من أصحاب شركات السياحة قدموا اقتراح لوزير السياحة والآثار شريف فتحى بمناسبة افتتاح المتحف للاتفاق مع شركات مصر للطيران وإير كايرو على تزيين هياكل وأجسام 10 طائرات اللي بتتجول فى العواصم العالمية زي بكين وبرلين ووارسو وموسكو وروما وباريس ولندن بالرسومات الفرعونية الجميلة وبموعد افتتاح المتحف بالإضافة إلى حرص طاقم الضيافة على الطائرات على ارتداء الزى الفرعونى المبهر وتشغيل الشاشات داخل الطائرات بأفلام ودعاية عن المتحف ومقتنياته الأثرية وأهميته ومنح كل شخص لديه تذكرة طيران على هذه الطائرات 50% خصما على تذاكر دخول المتحف حتى نهاية العام الحالى.. ودا غير الاتفاق مع شركات مترو عالمية للدعاية لنفس الغرض.
كمان نخلي بالنا إن الحدث الضخم اللي هيحصل في مصر يوم 3 يوليو الجاي هيجذب أثرياء العالم والمليارديرات الي السوق المصري وكمان هيحول مصر لمركز سياحي عالمي ومركز إقليمي لشركات السفر والسياحة الدولية وكمان مصر هتتحول لسوق إقليمي مهم لبراندات عالمية زي الفنادق والمطاعم وماركات ملابس وأحذية وحقائب دولية وغيرها من المنتجات.. يعني بداية من يوليو هيحصل تحول نوعي في الاقتصاد المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
