يا ترى إيه اللى بيحصل فى الكواليس الاقتصادية فى مصر دلوقتى؟ وليه بعثة صندوق النقد الدولى جاية القاهرة فجأة الإسبوع ده؟ .. وإيه اللى هيتراجع فى زيارتهم دى؟ والأهم الفلوس اللى كلنا مستنيينها هتيجى إمتى وهتبقى كام؟
وفقا لمعلومات تم تسريبها فبعثة صندوق النقد الدولى هتزور مصر الإسبوع ده عشان تبدأ المراجعة الخامسة لبرنامج الإصلاح الاقتصادى .. واللى بيحصل ده جزء من اتفاقية القرض اللى وصلت قيمته 8 مليار دولار بعد ما كانت 3 مليار بس فى مارس 2024.
طب إيه سر التحرك المفاجئ ده؟ .. وإيه اللى هيحصل فى الزيارة دى؟
خلينا نفهم سوا خطوة بخطوة.. وأول حاجة لازم نعرفها .. إيه اللى جاب البعثة دلوقتى؟
مصدر حكومى كبير قال إن الزيارة دى جاية فى الوقت المناسب عشان تراجع تقدم مصر فى تنفيذ الإصلاحات الاقتصادية .. يعنى هيشوفوا إذا كانت مصر ماشية على الطريق الصح ولا لأ .. وده بيحصل بعد ما الصندوق وافق فى أبريل اللى فات على صرف الشريحة الرابعة من القرض بقيمة 1.2 مليار دولار .. فالمراجعة الخامسة دى زى الامتحان الجديد اللى لازم مصر تنجح فيه عشان تاخد الشريحة الجاية.
" title="صندوق النقد يفاجيء مصر بتحرك جديد.. إيه اللي بيحصل في الكواليس" frameborder="0">
طب البعثة هتراجع إيه بالظبط؟
صندوق النقد عنده 3 أهداف أساسية زى ما قال جهاد أزعور مدير إدارة الشرق الأوسط فى الصندوق .. الأول: إن الاقتصاد المصرى ينمو بسرعة أكبر .. التانى: إن القطاع الخاص ياخد دور أكبر فى السوق .. والتالت: إن التضخم يتظبط ويقل تدريجيًا .. وهنا بقى لازم نركز .. التضخم فى مصر وصل 13.6% فى مارس اللى فات .. وده أعلى من 12.8% اللى كان فى فبراير .. ليه؟ .. عشان زيادة أسعار الوقود وتذكرة المترو والقطر .. وكمان زيادة رغيف العيش المدعوم بنسبة 300% فى مايو اللى فات .. فالبعثة هتبص فى الحاجات دى كلها وتشوف الحكومة بتعمل إيه عشان توازن بين الإصلاحات والضغط على المواطن.
طب الشريحة الخامسة هتيجى إمتى وهتبقى كام؟
بناءً على المعلومات المتوفرة .. لو المراجعة الخامسة تمت بنجاح .. مصر ممكن تتسلم حوالى 1.2 مليار دولار زى الشريحة اللى قبلها .. لكن إمتى؟ .. لو كل حاجة مشيت زى المراجعات السابقة .. يمكن نشوف الفلوس دى قبل نهاية السنة يعنى فى ديسمبر 2025 أو يناير 2026 .. بس ده كله هيعتمد على نتايج المراجعة ومدى التزام مصر بالإصلاحات.
ولازم نكون عارفين .. الاقتصاد المصرى دلوقتى بيعدى بظروف مش سهلة .. إيرادات قناة السويس لسة متأثرة بسبب التوترات فى البحر الأحمر .. لكن فى نفس الوقت الاقتصاد نما بنسبة 4.3% فى الربع التانى من السنة المالية الجاية .. وده أعلى نمو من سنتين ونص بفضل الصناعات التحويلية والسياحة .. وصندوق النقد كمان رفع توقعاته لنمو الاقتصاد المصرى بـ0.2% للسنتين الجايين .. يعنى فى أمل إن الأمور تتحسن لو استمرينا على الطريق ده.
الأكيد ان زيارة بعثة صندوق النقد الإسبوع ده مش مجرد زيارة عادية .. دى خطوة كبيرة عشان مصر تثبت إنها قادرة تواجه التحديات وتكمل مشوار الإصلاح.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
