الحكومة حاليا في حالة طوارئ لتأمين الكهرباء اللازمة لفصل الصيف.. ياتري ازاي الدولة بتستعد لفصل الصيف.. واية حكاية بطاريات التخزين اللي بيتم العمل بيها للمرة الأولي في مصر واهميتها في توفير الطاقة.
الحكومة عندها اختبار حقيقي بدأت من الصيف اللي فات تستعد له، وهو تامين الطاقة الكهربائية لفصل الصيف اللي جاي خصوصا ان الحكومة وعدت الناس انه مش هيكون في تخفيف أحمال تاني، أن الكهرباء هتفضل مستمرة وشغالة في اصعب الظروف خلال فصل الصيف، ورئيس مجلس الوزراء الدكتور مصطفي مدبولي طلع أكثر من مرة علي وسائل الاعلام وأكد أن الحكومة عند وعدها وانه مفيش تخفيف أحمال تاني في مصر لا في شهور الصيف ولا في شهور الشتاء.
كل التوقعات بتقول أن فصل الصيف اللي علي الأبواب هيكون واحد من اشد الفصول حرارة علي مدار السنين اللي فاتت، وعلشان كده الحكومة أعلنت حالة الطؤاري لتأمين التغذية لشهور فصل الصيف، والحكومة حاليا شغال بكل قوة لتوفير الطاقات اللازمة لاستمرارية التيار، والحكومة حاليا مركزة في خطة عملها علي التوسع في مجالات الطاقة الجديدة والمتجددة واللي بتعتمد في توليدها علي الشمس والهواء، ولأول مرة مصر دخلت حاجة اسمها بطاريات التخزين.
طيب اية حكاية بطاريات التخزين اللي الحكومة دخلتها دي وازاي هتساعد في تامين الطاقة لفصل الصيف اللي جاي ؟ .
الحكومة خلال فصل الصيف اللي جاي بتستهدف إضافة 4 الآف ميجاوات بتكلفة استثمارية سواء محليه أو أجنبية هتوصل إلى 4 مليار دولار، والطاقات الجديدة هيتم اضافتها بناء علي عقود شراكة بين الحكومة والقطاع الخاص، وكل الشغل ده هدفه، أن الحكومة تفضل ملتزمة بكلمتها لما قالت أنه مفيش عودة مرة تانية لتخفيف الأحوال، ده غير أن الطاقات الجديدة دي هتوفر لمصر مليارات الدولار كانت الولة هتصرفهم لأستيراد المازوت والغاز الطبيعي من الخارج واللي الدولة بدأت تستورده من السنة اللي فاتت لتشغيل محطات توليد الكهرباء، خصوصا أن الطاقات الجديدة هتوفر للحكومة 500 مليون و800 ألف جنيه يوميا من التكلفة المخصصة لأستيراد الوقود المستخدم لإنتاج نفس الكمية من الكهرباء.
الخطة اللي شغالة عليها وزارة الكهرباء والطاقة المتجددة لتأمين الكهرباء لفصل الصيف بتتضمن إضافة 2000 ميجا وات طاقات متجددة منهم 500 ميجاوات طاقة شمسية من مشروع أبيدوس واللي تم ربطه على الشبكة القومية للكهرباء خلال شهر ديسمبر اللي فات، وكمان هيتم إضافة 1500 ميجاوات طاقة شمسية وطاقة رياح وهيتم ربطهم علي الشبكة القومية للكهرباء بعد الانتهاء من مشروع الطاقة الشمسية الإضافى بقدرة 1000 ميجاوات ومشروع أمونت طاقة رياح الجارى تنفيذه بقدرة 500 ميجاوات، ده غير نظام التخزين بالبطاريات واللي الحكومة بدأت تشتغل بيه لاول مرة فى مصر واللي هيضيف 300 ميجاوات من محطة ابيدوس الشمسية واللى بتنفذها شركة ايما باور الإماراتية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
